Интервју со основачот на “Ценотека.мк”: Како транспарентноста и технологијата го менуваат пазарот во Македонија

Како функционира “Ценотека.мк” и што може да очекува просечниот корисник?
“Ценотека.мк” е платформа која овозможува едноставен и брз пристап до актуелните акции и цени во маркетите. Корисниците можат лесно да пребаруваат и споредуваат производи според категории, брендови или продавници. На пример, ако барате информации или цена за одреден производ, платформата ќе ви прикаже комплетна листа со цените од повеќе маркети, вклучувајќи ги и тековните акции и промоции. Ова не само што заштедува време, туку и им овозможува на потрошувачите да донесуваат информирани одлуки за својата потрошувачка.

Во моментов, посетителите на платформата имаат пристап до преглед на сите актуелни акциски каталози, а наскоро и до архивата на претходните акции од изминатите години. Оваа услуга е создадена за да ги задоволи основните потреби на потрошувачите, обезбедувајќи јасна слика за понудите на пазарот и историска слика за растот на цените.

Кои се следните чекори?
Во февруари започнуваме со детална евиденција на сите производи и брендови кои се присутни на македонскиот пазар, што ќе овозможи целосно мапирање на понудата. Од март, планираме да воведеме ажурирање на податоците во реално време, каде што корисниците ќе можат да видат не само каде се достапни производите, туку и актуелните цени во секој маркет. Дополнително, нашата цел е да ги вклучиме и малите локални маркети, овозможувајќи им поголема видливост.

Во иднина, ќе воведеме дополнителни функционалности, како креирање листи за следење производи, калкулатори за трошоци и персонализирани препораки базирани на трендовите и оценките на корисниците. Овие алатки ќе им помогнат на потрошувачите не само да планираат поефикасно, туку и да ја оптимизираат својата потрошувачка, добивајќи најголема вредност за својот буџет. Нашата визија е “Ценотека.мк” да стане неизоставен партнер за секој потрошувач, поставувајќи нови стандарди за транспарентност и информираност во Македонија.

Постојат слични платформи во Европа и соседството. Што е уникатно во вашата идеја или бизнис модел?
Прво и основно, ЦЕНОТЕКА е првата платформа која ги евидентира сите производи кои се продаваат од трговците низ Македонија, што е наш најсилен идентитет и ни дава уникатност во концептот. Додека останатите ценотеки се фокусираат само на споредба на цени, ние нудиме многу поширока вредност. Нашата визија е да создадеме трајна библиотека на информации која не само што ги следи цените, туку и зачувува податоци за составот, потеклото и влијанието на производите врз потрошувачите. Ова не е само платформа за споредба на цени, туку иницијатива која носи општествена одговорност,  да обезбедиме практични и достапни информации за тоа што се купува, по кои цени и како тоа влијае врз секојдневните избори на луѓето. Веруваме дека ваквата транспарентност е од клучно значење, не само за граѓаните денес, туку и како извор на информации што може да послужи за идните генерации.

Нашата цел е да создадеме платформа што ќе ги поттикне луѓето да донесуваат информирани одлуки, истовремено јакнејќи ја свеста за фер цени и квалитет на производите. Со ова, ја потврдуваме нашата посветеност кон локалниот пазар, борбата за економска стабилност и културолошкиот напредок во Македонија. Ова е уникатен проект кој досега не е направен во регионот, а ние веруваме дека ќе има значајно влијание врз подобрување на квалитетот на живот на граѓаните и транспарентноста на пазарот.

Како ќе се осигурате дека архивата ќе остане достапна и релевантна во долги временски периоди? Дали имате конкретен план за одржување на овие податоци?
Нашиот план вклучува неколку клучни аспекти. Прво, инвестираме во знаење и технологија за долгорочно складирање и одржување на податоците, осигурувајќи дека тие ќе останат достапни и за идните генерации. Второ, воспоставуваме партнерства со експерти и технолошки компании кои можат да помогнат со иновативни решенија за анализа и предвидување на економските трендови во трговијата и производството на храна и прехрамбени продукти . Конечно, се трудиме максимално и секогаш ги ажурираме податоците за да останат релевантни и корисни за корисниците. Веруваме дека овој холистички пристап ќе ни овозможи да ја зачуваме вредноста на нашата платформа во текот на времето.

Дали пристапот до платформата ќе биде бесплатен?
За пошироката јавност, особено за физичките лица, пристапот до “Ценотека.мк” и користењето на нејзините основни услуги ќе биде целосно бесплатен. Нашата главна цел е да им овозможиме на сите потрошувачи лесен и транспарентен пристап до информациите што им се потребни за поефикасно планирање на нивната потрошувачка.

За компаниите, платформата нуди дополнителни можности кои се наменети за подобрување на нивната видливост и присуство на пазарот. Овие можности вклучуваат пристап до алатки и податоци кои ќе им помогнат подобро да ги разберат трендовите и потребите на потрошувачите. Со тоа, им даваме шанса на компаниите да се прилагодат на пазарните услови и да го подобрат својот перформанс преку соработка со “Ценотека.мк”. Овие услуги се дел од нашата посветеност кон создавање транспарентен пазар и поддршка за сите учесници, без разлика на нивната големина. Секогаш сме отворени за разговори со компаниите кои ја препознаваат вредноста на нашата мисија и сакаат да станат дел од оваа заедничка иницијатива за подобрување на пазарот.

Дали сте анализирале како бесплатниот модел ќе влијае на долгорочната финансиска одржливост на платформата? Како планирате да обезбедите ресурси за идните проекти? Дали ова е само уште еден проект кој зависи од субвенции?
Ние сме приватна иницијатива, и нашата стратегија за приходи вклучува таргетирано рекламирање и дополнителни услуги за компании. За субвенции досега не сме размислувале, ниту знаеме дали државата би субвенционирала ваков тип на проекти. Во моментот, платформата е целосно самофинансирана, а нашите напори се насочени кон максимално искористување и оптимизација на постојните ресурси.

Исто така, нашиот фокус е на создавање силна и ангажирана заедница од потрошувачи, која ќе биде независна и транспарентна сила за развој и унапредување на “Ценотека.мк”. Наместо да се потпираме само на партнерства со големите играчи, нашата цел е потрошувачите да станат активни учесници кои ќе ги детектираат и пријавуваат аномалиите во цените или недостатоците во квалитетот на производите. Ние, како платформа, ќе се потрудиме квалитетно, точно и навремено да ги обработуваме и пренесуваме овие информации, создавајќи систем кој ги вклучува потрошувачите како активни учесници.

Дополнително, оваа заедница ќе им овозможи на трговците и производителите да имаат транспарентен увид во реалните искуства, критики и пофалби од потрошувачите. Ова ќе биде поттик за трговците да ја потврдат својата заложба за обезбедување на квалитет, фер цени и целосна транспарентност. На овој начин, веруваме дека “Ценотека.мк” не само што ќе ја зајакне довербата кај потрошувачите, туку и ќе придонесе за создавање пазар што функционира во корист на сите засегнати страни.

Имате ли резервен план ако финансирањето не се реализира?
Имаме јасен план за континуитет, иако сме свесни дека во овие турбулентни времиња никој не може да даде целосна гаранција за стабилност. Она што ја прави “Ценотека.мк” уникатна е нејзината неопходност како систем за сите актери во малопродажбата. Платформата не е само алатка за потрошувачите, туку и клучен сервис за државата, државните органи и индустријата во целина.

Нашата мотивација и посветеност се двигателите кои не зависат од надворешни институции или поддршка. Во случај на предизвици, нашиот план е да продолжиме со развој на нови иновативни алатки кои ќе ја зголемат вредноста за корисниците и партнерите. Истовремено, ќе работиме на зајакнување на партнерствата со сите релевантни учесници во индустријата и ќе се потпреме на поддршката од нашата заедница, која ја препознава важноста на транспарентноста и фер трговијата.

Веруваме дека преку синергија со потрошувачите, партнерите и ентузијастите кои ја споделуваат нашата визија, ќе создадеме уште поголема стабилност и ќе надминеме какви било потенцијални пречки. Ние сме подготвени да одиме до крај, преземајќи сите неопходни чекори за сигурно, одржливо и стабилно работење во иднината.

Дали “фер услови” значи дека ги охрабрувате потрошувачите да бараат најевтина цена, игнорирајќи ги квалитетот и услугата што ја нудат трговците? Зарем не мислите дека ова може да ја уништи вредноста на македонските брендови?
Напротив, веруваме дека транспарентноста ќе им помогне на брендовите да ги истакнат своите квалитети и да изградат доверба кај потрошувачите. Ние не се фокусираме само на цената, туку и на информациите за производите, нивниот состав, потекло и особено, на локациите каде што тие производи се произведуваат. Посветуваме посебно внимание на тоа да информираме во кои маркети можат да се најдат производите, што дополнително ја зголемува вредноста за нашите корисници. Ова ги охрабрува трговците да се натпреваруваат со квалитетот, достапноста и транспарентноста, а не само со цените.

Дополнително, соработуваме директно со трговците за да им покажеме дека оваа платформа преставува вистинска можност за раст. Понудивме работилници и консултации за тоа како да ги искористат податоците за подобрување на продажбата и за зајакнување на релацијата со потрошувачите. Веруваме дека со ваков проактивен пристап можеме да ја добиеме довербата на сите засегнати страни.

Што ќе направите за да ги мотивирате маркетите активно да соработуваат и да ги споделуваат своите податоци? Дали планирате посебни стимули или партнерски програми?
Разбираме дека соработката со маркетите е клучна за успехот на платформата, и токму затоа работиме на создавање посебни партнерски програми. Тие вклучуваат предности како таргетирано рекламирање, пристап до податоци за потрошувачките трендови и можности за зголемена видливост на нивните акции и производи.

Во план е да организираме работилници за маркетите, каде што ќе споделуваме добри практики и предлози за тоа како платформата може да го зголеми нивниот обем на продажба. Нашата цел е да создадеме ситуација каде што сите добиваат, маркетите, потрошувачите и пошироката заедница. Верувам во себе, во нашата визија и во тимот кој стои зад овој проект.

Како ја гледате иднината на платформата? Кои се следните чекори?
Во моментов остануваме посветени на имплементацијата на системот за собирање на цени, како и активно вклучување на заедницата на потрошувачи и партнерските маркети. Неколку тимови активно работат на класификација и колектирање на акциските каталози на 10 најмоќни маркети во Македонија. Со оваа класификација, не само што ќе се подобри корисничкото искуство преку брз и лесен пристап до релевантни податоци, туку и ќе се зголеми транспарентноста на сите учесници. Ова ќе им помогне на потрошувачите да донесуваат информирани одлуки и ќе ги охрабри трговците да се натпреваруваат во обезбедувањето повисок квалитет и подобри цени. До крајот на март ќе бидат пуштени првите производи, класифицирани во соодветни категории, со јасен преглед каде можат да се купат и по кои цени.

Дополнително, планираме можност за онлајн нарачки директно од маркетите по истите цени како во продавниците. Наместо достава директно од магацин, секоја нарачка ќе биде подигната од најблискиот маркет и доставена до потрошувачот во најкус можен рок. Доставата ќе биде флексибилна и динамична, овозможувајќи испорака преку партнерска мрежа на достапни возачи, што значително ќе го намали времето на испорака и ќе ја направи услугата брза и ефикасна. Ова ќе им овозможи и на нашите сограѓани во дијаспората да купуваат производи за своите блиски во Македонија со лесен и транспарентен процес, без дополнителни посредници или скриени трошоци.

Што би сакале да им порачатe на корисниците кои можеби сè уште не ја посетиле платформата?
Би им рекле дека “Ценотека.мк” не е само платформа, напротив, тоа е алатка која може да го подобри начинот на кој потрошувачите се справуваат со своите финансии. Ги поканувам сите да ја испробаат и да видат колку лесно може да заштедат време и пари. Покрај тоа, ги поканувам да ја посетат и нашата официјална Facebook страница, каде што можат да ги споделат своите мислења, сугестии или критики. Оваа отвореност не е само формална, туку преку неа создаваме систем за управување со мислеања од корисниците, каде што нашиот тим ќе ги анализира сите коментари и предлози, со цел постојано подобрување на платформата. Се радуваме на сите предлози, од оние кои веќе ја користеле платформата до оние кои сè уште размислуваат. Вашите идеи не само што ни помагаат да се подобриме, туку ни даваат мотивација да работиме со уште поголема посветеност. Ајде, бидете дел од приказната, критика или пофалба, ние ќе ги прочитаме сите и ќе работиме на нив!

Ви благодарам за инспиративното интервју. Успех на “Ценотека.мк”!

Ви благодарам и вам. Убав ден!